الهجرة الى كندا 2017 خطوات التقديم والاوراق المطلوبة

الهجرة الى كندا 2017 خطوات التقديم والاوراق المطلوبة
خطوات الهجرة إلى كندا 2017
كتب: آخر تحديث:

الهجرة إلى كندا (الجزء الأول) 🙂

هجرة العمالة الماهرة – Federal Skilled Immigration

أن أن أن آآآآآآآآنننن … الحقيقة البوست ده مؤجل من زمان. يمكن من 8 أو 9 شهور فاتوا. كنت ساعتها في عز المعمعة بتاعت الورق والتقديم والبحث والقراية وكدة. وكان كثير من أصدقائي في الشغل اللي كانوا عارفين الموضوع بييجوا يسألوني في حاجات ليها علاقة بالموضوع, لكن كان أغلب الناس بتقف عند حتة السؤال دي وخلاص. وكذا حد كان مش مصدق اني ماشي في الموضوع لوحدي من غير محامي وكنت ساعات بحس من الأسئلة انه حاسس اني مخبي حاجة, وكنت بعديها.

جالي ساعتها خاطر كدة اني أكتب على Facebookأشرح فيه الموضوع عشان اللي حابب يستفيد, وبعدين رجعت في كلامي. قلت اني لو كتبت كلام كثير وبعد كدة معرفتش أهاجر الكلام هيفقد مصداقيته, وهيبقى شكلي وحش.

المهم, أول أما ربنا أراد ان الموضوع يتم والناس معايا في الشغل ابتدت تعرف, تحولت فجأة لنجم سينمائي .. الناس كلها عايزة تسلم عليا وتصاحبني وتهزر معايا, وبقيت حتى لما بستظرف أو أقول نكتة بايخة, الناس بتضحك 🙂
وفجأة بقيت أعمل “ندوات” يومية أشرح فيها لناس كثير أعرفهم ومعرفهمش يبتدوا ازاي ويعملوا ايه ويحضروا ورق ايه ويقدموا امتى والصعوبات اللي ممكن تواجههم ايه هيا إلى آخره .. وحسيت ساعتها ان كلامي بقى ليه قوة الصخر. اللي بقوله محدش بيعيده ورايا. الإجابة اللي بجاوبها على أي سؤال محدش بيشكك فيها. والأهم اني تأكدت ان الكلام من غير فعل ملوش قيمة .. الناس عايزة تشوف example قدامها عشان تصدق.

لحد النهاردة الناس بتكلمني وأنا في كندا كل يوم تقريبا عشان تسألني عن الموضوع ده. وأنا أول شهر هنا بصراحة مكنتش رايق أكتب البوست ده لأني كنت متأكد انه هيبقى طويل ومحتاج تركيز مني. لكن الحمد لله جه الوقت.

خلينا نتفق على حاجة. الموضوع سهل وصعب. صعب لو انت مش مركز ومش مديله الأهمية الكافية في حياتك. عشان تهاجر لازم الموضوع ده ياخد حيز كبير من تفكيرك ومن وقتك ومن حياتك.لازم يكون عندك motive قوي جدا انك تهاجر. مش انك سمعت ان واحد عرف يهاجر ف الله بقى أنا كمان عايز أهاجر. الكلام ده أنا كنت بقوله لبعض الناس من اللي كانت بتيجي تتكلم معايا في الموضوع ده. كنت بقوله انت جاي تفعص في البضاعة. انت معندكش رغبة حقيقية نابعة من أسباب منطقية للهجرة. يعني مثلا من ضمن الناس حد أكون أنا اتكلمت معاه قبل كدة أيام لما كنت لسة في الأول وقاللي انه مش بيفكر في الهجرة وانه ميقدرش يسيب مصر وكدة, وفجأة لما عرف اني مهاجر خلاص اهتم بالموضوع.

أنا كنت عايش على الموضوع ده بس في حياتي. عمري في حياتي ما اديت أهمية لأي حاجة قد اني عايز أمشي. اللي يعرفوني كويس من زمان, يعرفوا اني عقلاني وواقعي وأحب أخطط كويس لأي حاجة وأعمل plan B عشان لو الخطة منجحتش. أول مرة في حياتي يبقى ردي على اللي بيسألني “ايه plan B بتاعتك لو الهجرة منفعتش ؟” اني مهاجر يعني مهاجر. أول مرة ميبقاش عندي plan B.
أول مرة في حياتي مفكرش في ال worst case scenarioo.

للدرجة دي أنا كنت motivated اني أمشي. أنا كنت “بذاكر” كندا حرفيا. متابع كل الصحف الكندية الكبيرة, وتابعت الانتخابات وقريت عن الأحزاب, والتكوينات العرقية لكندا, والحالة الاقتصادية أخبارها ايه, وكل مقاطعة على حدة اقتصادها عامل ازاي وايه عيوبها ومميزاتها وتكاليف المعيشة فيها ونسبة المهاجرين واللغات اللي بيتكلموها. ده طبعا غير اني كنت بقرأ كل حرف بيتكتب على الانترنت ليه علاقة بالهجرة وقوانين الهجرة. وكنت بدخل في ال forums اللي فيها ناس كنديين بيتكلموا عن كندا أوناس عايزة تهاجر أو ناس وصلت كندا فعلا عشان أحاول أفهم كل حاجة. كل ده أنا كنت بعمله وأنا مش ضامن أي حاجة …. كل ده وكان ممكن معرفش أهاجر.

لو انت قريت لحد هنا ومزهقتش من الرغي اللي فوق, يبقى غالبا انت عندك رغبة حقيقية انك تهاجر ومهتم تعرف التفاصيل 🙂

************************************************************************************
ملحوظة مهمة 11: أنا مش الحكومة الكندية. أنا بحكي تجربتي واللي نفع معايا. أنا لو مكانك, هتأكد من كل معلومة. الكلام اللي أنا بقوله ساري حتى تاريخ الكتابة 24 أكتوبر 2016. قوانين الهجرة وشروطها بتتغير كل فترة, فلو حد مش هيشتغل على الموضوع علطول, وناوي يأجل 6 شهور مثلا أو سنة, يبقى لازم يراجع كل حاجة.

ملحوظة مهمة 2: مكاتب الهجرة كلها اللي في مصر بتقع تحت بند من اتنين. نصابين, ولو مش نصابين حرامية. حيضرب منك 7 أو 8 آلاف دولار – دي أتعابه غير مصاريف الهجرة – ومش هيعمل أي حاجة انت متقدرش تعملها لوحدك. وال risk كله عليك لوحدك. يعني لو معرفش يسفرك, هيضرب منك ال كام ألف دولار كدة كدة. اللهم بلغت.

ملحوظة مهمة 3: الرجاء الحفاظ على الملكية الفكرية لصاحب المقال عشان تعب فيه قوي والله وكتبه على كذا يوم. شير في الخير لكن بلاش copy و paste.

بسم الله نبدأ.

أنا هكتب هنا التسلسل المنطقي للخطوات اللي أنا شايف انك لازم تعدي بيها عشان ان شاء الله تهاجر. طبعا أنا هنا هشرح الجزء في الهجرة اللي اسمهFederal Skilled Immigration اللي هو هجرة أصحاب الخبرات العملية المطلوبة في كندا. فيه فروع أخرى للهجرة زي هجرة رجال الأعمال أو أصحاب الحرف اليدوية أو ان حد ييجي يدرس هنا مثلا, وكل حاجة وليها شروط مختلفة.

حاجة كمان: الحكومة الكندية بتعمل من سحبتين لثلاثة كل شهر من على السيستم. كل سحبة ممكن عدد الناس اللي فيها يتراوح من 700 مثلا لحد 2000. بعد كل سحبة, الحكومة بتنشر على الموقع بتاعها عدد الناس اللي سحبتهم, وأقل واحد في السحبة دي كان جايب كام. عموما, عشان يبقى عندك تصور, تابع السحب من هنا (ده تاني أفضل موقع بعد موقع الحكومة):
http://www.canadavisa.com/news/latest.html

حاجة كمان للمتزوجين: يستحسن كل واحد فيكم يجرب الخطوات الجاية. لأن الحكومة الكندية بتسمح ان ممكن أي من الزوجين يبقى ال primary applicant والثاني بيبقى secondary. اللي يحدد مين فيكم يبقى primary هو ال score النهائي من 1200. المفروض اللي يجيب أعلى يبقى هو ال primary.

1- أول حاجة, لازم تعرف ال National Occupation Classification code بتاعك ايه. ده كود كدة من أربع أرقام لكل occupation في كندا. كندا بتدي كل شغلانة NOC code و Skill Level/Type. عشان تقدر تيجي تحت ال Federal Skilled Worker وشغلانتك تبقى محسوبة Skilled, لازم تندرج تحت Skill Level 0 أو A أو B. فحضرتك هتدور على الكود بتاع شغلانتك وتتأكد من ال Skill Level بتاعه وتكتب الكود على جنب عشان هتحتاجه في كل حاجة.
الكلام ده ممكن تعرفه أونلاين من هنا: http://www.cic.gc.ca/english/immigrate/skilled/noc.asp

أو تنزل الملف كله من هنا: http://www5.hrsdc.gc.ca/…/2…/pdf/PrintableVersionNOC2011.pdf

2- بعد أما تعرف ال NOC code تشوف انت eligible تقدم في كندا ولا لأ تحت فئة ال Federal Skilled Worker. ده بيبقى points grid من 100 نقطة. أي حد يجيب 67 أو أكثر يبقى eligible. ده ممكن تعرفه من هنا:
http://www.cic.gc.ca/en…/immigrate/skilled/apply-factors.asp

3- طلعت الحمد لله eligible وكل حاجة. المفروض دلوقتي تعمل لنفسك profile على السيستم بتاع الحكومة الكندية, وده اسمه Express Entry profile, وبتاخد تقييم من 1200 نقطة على سيستم اسمه Comprehensive Ranking Systemحسب سنك ومؤهلك وعدد سنين خبرتك ومستواك في الانجليزي أو الفرنساوي – اللغتين الرسميتين لكندا – ومؤهلات زوجتك لو كنت متزوج, وأي خبرة سابقة في كندا.
على السيستم ده,انت بتبقى موجود في ال pool of candidatess اللي زيك ومتشاف من الحكومة الكندية ومن المقاطعات الكندية. البروفايل بتاعك ده لسة مش هجرة. ده ماهو إلا إبداء رغبة منك انك عايز تيجي كندا, والسيستم مديك score معين على حسب المؤهلات اللي انت بتدعي انها عندك.
فكر فيها كإنها job vacancyy فاتحة في شركة, والشركة قايلة الشروط اللي عايزاها عشان الناس تقدم, وفيه ناس كثير غيرك هتقدم, بس الشركة اللي بتختار في الآخر.

تقدر تعرف انت هتجيب كام من 1200 مقدما قبل أما تعمل profile فعلي على موقع الحكومة. ده ممكن تعرفه من هنا, وزي ما قلت هي دي الحتة المهمة للمتزوجين ان كل واحد يشوف هيجيب فيها كام عشان نحدد مين ال main applicant.
ملحوظة: السؤال المتعلق بمستواك في اللغة هتفترض فيه إجابة لأنك لسة معملتش امتحان يثبت مستواك في اللغة.
http://www.cic.gc.ca/english/express-entry/grid-crs.asp

عرفنا مين ال main applicant الحمد لله. بداية من هنا – الكلام للمتزوجين – ال main applicant بس هو اللي اجباري عليه الخطوات الجاية.

4- كندا ليها لغتين رسميتين: انجليزي وفرنساوي. حضرتك هتمتحن IELTSلو ناوي تختار لغتك الأولى انجليزي, أو تمتحن TEF لو لغتك الأولى فرنساوي.
ملحوظة: ال secondary applicant كمان ممكن يمتحن لو عايزين تعلوا ال scoree بتاعكوا, لكن مش اجباري.
للناس اللي في مصر, ممكن تحجز IELTS مع ال British Council وممكن تحجز TEFF مع المعهد الثقافي الفرنسي.
http://takeielts.britishcouncil.org/
https://institutfrancais-egypte.com/ar/

5- على ما معاد الامتحان ييجي, وبما أن مؤهلك الدراسي من خارج كندا, فهتعمل حاجة كمان اسمها Educational Credential Assessment (ECA). وده كدا شبه إقرار من جهة في كندا بتقول فيه للحكومة مؤهلك الخارجي ده بيساوي ايه في كندا. يعني البكالوريوس بتاعك مثلا – اللي من كلية معينة وجامعة معينة – بيساوي بكالوريوس برضه في كندا ولا أعلى ولا أقل.
ده الحكومة الكندية ادتك الاختيار من بين 3 جهات في كندا المنوط بيها تعمل ال assessment ده:
http://www.wes.org/ca/fswp/
http://www.icascanada.ca/fsw/home.aspx
http://learn.utoronto.ca/…/comparative-education-service-ces
ملحوظة: أنا اخترت أعمل ال assessmentt مع أول جهة.

6- امتحنت انجليزي أو فرنساوي والنتيجة طلعت, وعملت assessment والنتيجة جاتلك, انت دلوقتي جاهز تعمل Express Entry profile.
ال Express Entry profilee ده هتجاوب فيه عن أسئلة كثيرة تخصك وتخص أسرتك ومفيهوش دفع فلوس (انت دفعت في الامتحان وفي ال assessment). ومش هيتطلب منك اثبات دلوقتي على أي حاجة انت هتقولها. وهتاخد score من 1200 زي ما قلت على حسب إجاباتك. البروفايل من هنا:http://www.cic.gc.ca/english/e-services/account.asp#login

7- مليت ال Express Entry profile وعملت submission والحمد لله, تعمل بقى registration مع Job Bank Canada. دي خطوة اجبارية الحكومة بتطلبها عشان انت تبقى متشاف من ال employers في كندا. ال registration من هنا:
http://www.jobbank.gc.ca/home-eng.do?lang=eng

8- انت دلوقتي ممكن تحط ايدك على خدك وتستنى العدل. بس دي أسوأ حاجة ممكن تعملها. لأن العدل مبيجيش لوحده إلا لو انت البروفايل بتاعك سوبر. يعني تكون انت ومراتك مثلا عندكم لغة قوية وانتوا الاتنين جايبين تقديرات عالية جدا في الامتحانات, وانتوا الاتنين عندكم عدد سنين خبرة عملية فظيعة, وانتم الاتنين معاكوا ماجستير أو دكتوراه مثلا. من الآخر, عشان تقف عند الخطوة دي وتستنى الحكومة هي اللي تبعتلك لازم تكون مقفل الامتحان. طب نعمل ايه؟ أصعب خطوة من حيث التركيز المطلوب والسرعة في رد الفعل في الموضوع كله، ال Provincial Nomination.

ليه لازم تدورعلى ال nomination ؟ عشان الحكومة الكندية هتديك 600 نقطة زيادة على أي score انت جبته على ال Comprehensive Ranking System لو نجحت انك تخلي محافظة كندية تعملك ترشيح. ده هيخلي ال score بتاعك ينط فوق قوي فالحكومة تسحبك من ال pool of candidates وتبعتلك Invitation to Apply for Immigration.
طب حد شاطر ودخل يدعبس من ورايا يقوللي طب مش أنا ممكن أجيب 600 نقطة لو جبت job offer برضو ؟ أقوله برافو عليك. بس دي رابع أصعب حاجة بعد الغول والعنقاء والخل الوفي.

نرجع لمرجوعنا, كل مقاطعة ومحافظة في كندا ليها موقع على الانترنت. على الموقع ده, هتلاقي كل محافظة حاطة list بتاعت شغلانات عندها فيها نقص. حضرتك هتدور على شغلانتك على كل موقع من دول وتعرف مين اللي عايزك عنده. بعد أما تعرف انت مطلوب فين بالضبط, تشوف شروط التقديم للمحافظة دي – من على الموقع برضو – وتجهز ورقك بالشكل اللي هيطلبوه, وتستنى يفتحو باب التقديم.
الصعوبة اللي كنت بقول عليها في الحتة دي, انك تعرف بدري أول لما باب التقديم في محافظتك يفتح, وتكون واحد من أول الناس اللي تقدم (لازم يكون ورقك جاهز طبعا).

مواقع المحافظات:
Alberta
http://www.albertacanada.com

British Columbia
http://www.welcomebc.ca/home.aspx

Manitoba
http://www.immigratemanitoba.com

New Brunswick
http://www.welcomenb.ca/content/wel-bien/en.html

Newfoundland & Labrador
http://www.nlpnp.ca

Nova Scotia
http://www.novascotiaimmigration.com

Ontario
http://www.ontarioimmigration.ca/en/index.htm

Prince Edward Island
http://www.opportunitiespei.ca

Saskatchewan
http://www.saskatchewan.ca

عشان تعرف الأخبار دي أول بأول, تابع المواقع اللي تحت دي كل يوم واشترك في ال mailing lists بتاعتهم عشان يتبعتلك emails عن آخر أخبار الهجرة:

Citizenship & Immigration Canada
http://www.cic.gc.ca/english/index.asp

CanadaVisa Website
http://www.canadavisa.com

CanadaVisa Page (LinkedIn)
https://www.linkedin.com/company/1799035

CanadaVisa News Portal
http://www.canadavisa.com/news/latest.html

CIC News
http://www.cicnews.com

9- خلصت الخطوة اللي فاتت ولحقت تقدم لمحافظة – أو أكثر – اللي عايزاك. هنا بقى تحط ايدك على خدك وتستنى المحافظة تبعتلك. ممكن يبعتولك ايميل الأول وممكن يبعتولك على ال mailbox بتاع ال Express Entry Profile على سيستم الحكومة علطول. خليك مصحصح. عشان أول أما هيجيلك nomination لازم تعمل accept علطول.

10- بعد أما تعمل accept لل provincial nomination, هتلاقي ال points بتاعتك زادت 600 كمان – مش لازم في نفس اليوم – وبعدها بكام يوم الحكومة الكندية تبعتلك ITA (Invitation to Apply). بعدها هما هيقولولك تعمل ايه خطوة بخطوة.

أنا كدة خلصت 🙂 أنا بذلت المجهود ده من باب “علم ينتفع به” وبتمنى ان أي حد من ملايين الناس اللي عايزة تهاجر يستفيد من الكلام ده في مشواره للهجرة.

*** مكاتب ترجمة معتمدة ***
Middle East Library: 0233351141 (Translation onlyy)

ICU Translation Service: 0233459623 (Translation, Certification, Affidavit & Notary Public)

Deborah Laws & Associates: 0224175844 (Translation – Certification)

الهجرة إلى كندا (الجزء الثاني) 🙂

لينك الهجرة إلى كندا (الجزء الأول):
https://www.facebook.com/ahmed.aziz.7355079/posts/10157665109090173

أولا, أحب أشكر آلاف الناس اللي عجبها الموضوع وتفاعلت معاه. أنا عارف ان الهجرة مطلب جماهيري لكن فعلا متوقعتش الكم ده من الدعوات والأماني الطيبة بالتوفيق. دي أجمل حاجة حصلت معايا وأنا محتاجها فعلا 🙂

ثانيا, التعليقات اللي انبسط منها جدا الناس اللي قالتلي ان البوست ده حط رجلهم على أول الطريق وانهم اتشجعوا وهيبتدوا الرحلة. هو ده كان هدفي من البوست. انه يدي أمل ويعرف الناس أول الطريق.

ثالثا, البوست بفضلكم بقى “دولي” مش مصري بس. كلمني ناس من السودان والعراق واليمن والسعودية والمغرب ودول عربية تانية !! كلمني حد من أمريكا !

رابعا, بعتذر جدا جدا على التأخير ما بين نزول البوست الأول والثاني لكن الوقت ضيق جدا عندي. هبدأ علطول بأهم الأسئلة والموضوعات اللي الناس بعتتلي عليها. طبعا فيه حاجات أنا ممكن أكون مشفتهاش لكن أنا حاولت أجمع من كل اللي جالي على قد ما أقدر.

** انت متكلمتش عن Quebec خالص.
ده صحيح, لأن محافظة Quebecc ليها نظام هجرة مختلف تماما عن باقي كندا. كأنها بلد تانية, وأنا مش ملم بتفاصيلها قوي فمحبتش أدخل في الموضوع. لكن كان ليا معاهم تجربة سيئة في الهجرة, فأخذت قرار إني مش هحرق جاز عليهم وقررت أركز مع ال Express Entry.

** ناس كثير سألت عن برامج الهجرة التانية, فده اللينك اللي تقدر تعرف منه بعد أما تجاوب على شوية أسئلة انت ممكن تيجي على أي برنامج هجرة:
http://www.cic.gc.ca/ctc-vac/getting-started.asp

** ال IELTS جينيرال ولا أكاديميك؟
Generall. ال جينيرال هوة المطلوب دائما في أي مشروع هجرة – على الأقل أنا أعرف كندا وأستراليا ونيوزيلندا – وال أكاديميك دائما مطلوب للدراسة.

** مصاريف الهجرة كام؟
• امتحان اللغة (حسب الامتحان انجليزي أو فرنساوي والرسوم المقررة من الجهة المختصة وقتها)
• ال credentials assessmentt (حسب الجهة اللي هتختارها وحسب سعر الدولار الكندي في وقت المعادلة – الدفع بالدولار الكندي)
• الترجمة وال certification بتاعت الورق (حسب السعر ساعة الترجمة)
• رسوم الهجرة (حسب عدد أفراد الأسرة – الدفع بالدولار الكندي)

زي ما انتم شايفين, مفيش رقم ثابت. بس هيا دي الحاجات اللي هتدفع فيها. كل حاجة من اللي فوق ليها موقع/مواقع تقدر تعرف منها التفاصيل. أنا قلت على أول 3 حاجات في المقال الأول, وبالنسبة لرسوم الهجرة فكانت لأسرة من 3 أفراد 2230 دولار كندي متقسمة كالتالي:
Permanent Resident Application Fee – Main Applicant: $550
Right of Permanent Residence Fee – Main Applicant: $490
Permanent Resident Application Fee – Spouse: $550
Right of Permanent Residence Fee – Spouse: $490
Permanent Resident Application Fee – Child: $150
عموما, ممكن تتابع أي مصاريف متعلقة بالهجرة أو الجنسية من هنا:
http://www.cic.gc.ca/english/information/fees/fees.asp#rprf

** إزاي ممكن أدفع بال credit card بعد ال limits اللي كل البنوك حاطاها في مصر؟
الحقيقة معرفش لأني دفعت كل حاجة قبل ال limitss دي متتحط. لكن ممكن تخلي واحد صاحبك أو قريبك عايش برة يدفعلك بال credit card بتاعته وانت تبقى تديله فلوسه cash. معرفش طريقة تانية.

** الموضوع كله ياخد وقت قد ايه؟
لو انت جاهز وورقك مفيهوش مشاكل وجبت ال nominationn في وقت معقول, الموضوع يخلص من 6 شهور ل 10 شهور .

** الفلوس المطلوبة عشان ال bank statement والفترة الأولى في كندا.
http://www.cic.gc.ca/english/immigrate/skilled/funds.asp

اقروا الكلام ده عشان طبعا كل الناس هتسألني: “وأنا أجيب الفلوس دي منين؟”
https://get2canada.wordpress.com/advice-on-proof-of-funds/

الراجل ده بيقولك ممكن شقتك أو بيتك اللي باسمك ينفع ك Proof of Funds. لكن طبعا لو الفلوس مش سايلة فإنت وحظك. القرار في يد ال visa office اللي هيبقى شغال على ال فايل بتاعك. ده كلامه:
(…… or also look into selling assets to accrue adequate funding. Some visa offices will also accept equity in property as proof of funds so if you own a house you can provide 3 valuations and a mortgage letter as part or all of your proof of funding)

الحقيقة ده أكثر سؤال بتسأله ودايما إجابتي: معرفش. معرفش لو حد مش معاه المبلغ كاش في البنك ممكن يعمل ايه, وهل اثبات ان فيه حاجات أكثر من المبلغ ده بإسمه ممكن يبيعها لو جاله هجرة ينفع ولا لأ. وعلى قد ما دورت على الانترنت مش لاقي إجابة أكيدة من على الويبسايت الرسمي بتاع الحكومة مثلا..

استنتاجي الشخصي (مش شرط يبقى صح), انه ينفع ميبقاش معاك الفلوس دي في الأول. ليه بقول كدة؟ عشان أكبر شركة هجرة كندية – Campell Cohen – عاملين على الويبسايت بتاعهمhttp://www.canadavisa.com/ free assessmentt للهجرة, وفي الحتة بتاعت الفلوس, مش حاطط السؤال زي ما الحكومة الكندية حاطاه. هما بيسألوك عن ال Net Worth بتاعك. وببساطة, ال Net Worth هو قيمة كل ما تملكه أنت و زوجتك من أموال في البنك مضافا إليها قيمة أي أصول باسمكم (عقارات, سيارات, شهادات استثمار …إلخ) ناقص أي ديون عليكم (قروض, credit cards …إلخ). الرقم النهائي بتاع كل ما تملك مخصوم منه كل اللي عليك من ديون هو ال Net Worth.

الحاجة الثانية اللي بترجح الاستنتاج ده, اني كنت بتكلم مع صديق وقاللي انه بعد الرجوع لأكبر مكتب هجرة لكندا موجود في مصر, موضوع ال Net Worth ده هوة اللي بيفرق, ومش شرط المبلغ يكون كاش في البنك.

** شهادات الخبرة شكلها إزاي؟
ملهاش فورمة ثابتة. كل محافظة ممكن تطلب منك شوية معلومات تبقى موجودة في شهادة الخبرة بتاعتك. لما تحط عينك على المحافظة اللي عايزاك, هتلاقي عندهم documents checklist و application guide بيوضحوا فيه بالتفصيل كل حاجة.
أما على مستوى الحكومة الفدرالية – كندا – فشهادات الخبرة بتبقى كالتالي:
1- كل job title في ورقة لوحده.
2- فيها اسمك بالكامل والتاريخ اللي ابتديت وأنهيت فيه الشغلانة دي.
3- اسم الشركة واسم ال team أو الإدارة اللي اشتغلت فيها.
4- ال main duties بتاعتك في الشغلانة.
5- ممضية من مديرك المباشر أو حد من ال HR.
6- سواء مديرك أو ال HR اللي ماضي,لازم يكون فيه contact informationn. اسم الراجل, مسماه الوظيفي, رقم تليفونه, ال email بتاعه.
7- الكلام ده كله يبقى مطبوع على ال letter head بتاعت الشركة. اللي عليها logoo الشركة من فوق, وعنوان الشركة وأرقام تليفوناتها وال email بتاعها من تحت.

** ليه كندا مش أستراليا أو نيوزيلندا؟
السؤال ده اتسألته كثير قوي رغم اني بستغربه. ردي على أحد الإخوة كان التالي: “احنا مصريين أو عرب. مش انجليز أو أمريكان فبنختار عايزين نعيش فين. رفاهية الاختيار مش عندك. انت واحد عايز “يلحق” يمشي من بلد اقتصادها واقع والباسبور بتاعك ملوش لازمة في أي حتة محترمة في العالم. الموضوع بالنسبة لينا “المتاح” ايه. والمتاح يعني شغلك مطلوب فين. الحتة اللي شغلك مطلوب فيها أكثر احتمالات الهجرة الناجحة ليها أكثر. أيا كانت بقة. أستراليا, كندا, نيوزيلندا, ألمانيا … كلها دول بتحترم الانسان ولو اشتغلت في أي واحدة فيهم غالبا هتبقى مبسوط”.

** لازم أقعد فترة قد ايه في المقاطعة لو جالي ترشيح منها؟
بالرجوع لل Canadian Charter of Rights and Freedomss انت من حقك تتحرك في أي حتة جوة كندا. لكن, متنساش انك بتمضي على وثيقة والمحافظة بتعملك nomination بتقول ان نيتك تقيم في المحافظة دي. فمن باب العرفان بالجميل للمحافظة اللي لولاها مكنتش جيت كندا, لازم تحاول بكل طاقتك انك تلاقي شغل وتستقر في المحافظة على قد ما تقدر. لو مفيش شغل وجالك job offer كويس من برة المحافظة – بعد ماتكون انت حاولت – مفيش مشكلة. اقرو المقالين دول عن الموضوع:
http://www.immigrationcoach.ca/provincial-nominee-moving-t…/

http://immigration.ca/…/168-mobility-rights-of-canadian-per…

وده ال Canadian Charter of Rights and Freedoms:
http://laws-lois.justice.gc.ca/eng/Const/page-15.html

** مين يبقى ال main applicant لو الزوجين جامدين و eligible ؟
في الحالة دي رأيي ان ال main applicantt يبقى اللي فرصته أحسن انه يعرف يجيب nomination. بمعنى انهم يشوفوا مين فيهم شغلانته مطلوبة في ولايات أكثر وهوة ده اللي يقدم.
جالي هنا سؤال بيقول, ينفع أنا وجوزي نبقى main applicantss؟ الإجابة: لأ. واحد فيكوا بس هو ال main والتاني secondary ويتحدد بناء على الكلام المكتوب فوق.

** الناس اللي المهن بتاعتها في Skill Level C or D تعمل ايه؟
http://www.cic.gc.ca/english/immigrate/skilled/noc.asp

** هل بحتاج أعمل credentials assessment لكل الشهادات اللي أخدتها؟
لأ مش لازم. لكن لو حابب تعمل كدة انت حر. لكن العادي انك تبعت آخر شهادة بس أيا كانت. دي اللي هتاخد عليها ال points. يعني لو حضرتك خريج جامعة, يبقى تبعت شهادة الجامعة فقط (مش الثانوية العامة) وهكذا.
لو من مصر, أعتقد أغلبنا معاه الشهادة المؤقتة – قليل اللي معاه الكرتون الكبيرة – والمؤقتة كافية جدا. دي اللي هترجمها مع بيان الدرجات وتبعتها.

كل حاجة عن الجهات اللي بتعمل credentials assessment قبل ما تيجي كندا – بما فيهم الجهات المختصة بالأطباء والصيادلة – تعرفها من هنا:
http://www.cic.gc.ca/engli…/immigrate/skilled/assessment.asp

** هل لازم الجامعة هي اللي تبعت الورق لجهة المعادلة؟
الحقيقة ده اللي لسة مكتوب على الويبسايت بتاع WESS مثلا, وده اللي كان موجود أيام لما أنا قدمت. لكن هما سهلوا الموضوع دلوقتي وبقة ممكن انت اللي تبعت الحاجة بتاعتك. الكلام ده وشكل الظرف موجود هنا:
http://nr1.s3.amazonaws.com/…/Sample%20Sealed%20Envelope.pdf

طبعا من مصر مستحيل الجامعة تبعتلك هيا حاجة لبرة, فأنا رحت الجامعة وخليتهم يدوني الورق اللي أنا عايزه – بيان الدرجات وشهادة التخرج – واشتريت من الجامعة ظرف كبير عليه ال logo بتاع الجامعة والعنوان وكدة, وحطيت الحاجة جوة الظرف وقفلته, وخليت الموظفة المختصة تختملي على مكان قفل الظرف, وبعدين عديت على نائب رئيس الجامعة – طبعا ممكن العميد أو حتى موظف في شؤون الطلبة – وطلبت منه يمضيلي على مكان قفل الظرف. وبعت الحاجة وقلت أنا وحظي بقة وقبلوها الحمد لله. باختصار, أنا عملت اللي WES بقت تسمح بيه دلوقتي عادي.

Regulated Vs. Non Regulated Occupations
كندا مقسمة المهن لأحد نوعين:
1-Regulated
دي المهن اللي محتاجة معادلة ومذاكرة وامتحان ورخصة قبل السماح بمزاولتها في كندا. زي الأطباء والمحامين والمهندسين … إلخ. وممكن تبقى regulated في مقاطعة وفي مقاطعة تانية non regulated. الموضوع كبير.
هنا حضرتك هتعمل ال credentials assessmentt زي كل الناس عادي قبل ما تقدم على الهجرة.
وبعد لما ان شاء الله تنور في كندا هتعمل بقة معادلة مع الجهة المختصة ولازم تاخد ترخيص بمزاولة المهنة عشان تعرف تبتدي شغل..

2-Non Regulated
أغلب المهن في كندا بتقع تحت الشريحة دي, وأشهرها شغل ال ITT كله, وده مبيحتاجش يعمل حاجة ويقدر يشتغل أول لما ييجي.
هنا حضرتك بتعمل ال credentials assessmentt بس قبل ما تيجي, وبعد أما تيجي تقدر تشتغل علطول.

أعرف منين مهنتي تحت أي تصنيف ومحتاج أعمل ايه بالضبط؟ من هنا:
http://cicic.ca/…/Find-out-if-your-occupation-…/index.canada

** ازاي ممكن تاخد والدك أو والدتك معاك. أو تبعتلهم ييجو بعد أما توصل كندا.
انت ممكن تحط والدك أو والدتك معاك في ال applicationn من الأول وتدفعله فلوس الهجرة وكل حاجة. طيب ليه ناس كثير مش بتعمل كدة؟
لأن في المراحل المتقدمة, الحكومة الكندية هتطلب من حضرتك كشف طبي كامل على كل من هو موجود في ال application. يعني حضرتك وزوجتك وأولادك ووالدك أو والدتك لو اخترت انك تحطه معاكوا من الأول. أي حد في ال applicationعنده لا قدر مرض بتعتبره الحكومة خطر على الصحة العامة في كندا (معدي) أو مرض مزمن وحالة غير مستقرة مما سيضع حمل على الحكومة الكندية للتكفل بالعلاج, ال application كله بيترفض بكل الناس اللي فيه.

عشان كدة, الناس بتطلع لوحدها الأول أو مع أسرتها الصغيرة, وبعدين يقدم للأب أو الأم أو الجد أو الجدة على حاجة من ثلاثة:

1- Sponsorship Visa
http://www.cic.gc.ca/english/immigrate/sponsor/parents.asp

2- Parent and Grandparent Super Visa
http://www.cic.gc.ca/english/visit/supervisa-who.asp

3- Visitor Visa
http://www.cic.gc.ca/english/visit/apply-how.asp

وده الفرق بين ال Super Visa و ال Visitor Visa
http://www.cic.gc.ca/english/helpcentre/answer.asp…

** إزاي ممكن أعلي ال CRS Score بتاعي؟
طبعا ممكن تعلي ال score بتاعك بإنك تمتحن امتحان اللغة تاني وتجيب scoree أعلى.ولو حد صغير في السن ولسة قدامه كذا سنة ممكن كمان يعمل ماجستير. بس عن تجربة, الأفضل انك تسعى في ال nomination لو نتيجة الامتحان مش هتعليك عن ال 400 نقطة.
بمعنى, لو واحد مثلا جايب 320 ولو امتحن لغة تاني هيبقى 3600. ده ميمتحنش تاني. ده يسعى في ال nomination علطول. أنا شخصيا كنت جايب 345 ومدخلتش أمتحن تاني, وجالي الحمد لله nomination من Saskatchewan.

لكن لو حد مثلا جايب 380, وبعد امتحان لغة بدرجات أحسن هيبقى 420, فيمتحن تاني لأن فيه محافظة Ontario مثلا – اللي فيها Toronto و Ottawa – بتبص على الناس اللي جايبة فوق ال 400 وبتعملهم nomination من غير ميقدمولها. فبكدة يبقى بعد أما تخلص امتحان اللغة وتبتدي تجري على ال nomination, عندك أقوى محافظة كمان هي اللي بتبص على الناس اللي زيك وبتختار منهم. يعني بتعلي فرصك.

** عايز أعرف كل حاجة عن ال Permanent Residence والمدة بتاعتها وشروطها.
http://www.cic.gc.ca/english/newcomers/about-pr.asp

** أنا امتى بالضبط ببقى Permanent Resident؟
أول لما تنزل في المطار في كندا. فيه اجراءات هتخلصها في المطار مع موظف في إدارة الهجرة, وعلى أساسها بيديك ال Permanent Residence. وبياخد منك العنوان اللي هتبقى فيه في كندا عشان يبعتولك ال PR Card عليه.

** طب لو أنا اتعملي nomination من أي محافظة, لكن أول نزول ليا في كندا كان في مطار Toronto, Ontario مثلا. بخلص اجراءات الإقامة فين وهل أقدر أدخل تورونتو ولا لأ.
حضرتك بتخلص الإجراءات في أول مطار تنزل فيه. وطالما خلصت الإجراءات, يعني انت بقيت permanent resident خلاص وتقدر تروح أي حتة. مثلا, انت اتعملك nomination من Alberta, بس انت جاي من مصر فأول نزول ليك هيبقى في تورونتو. لو حابب تشوف تورونتو الأول بما أنك فيها, ممكن تحجز فترة في أوتيل مثلا في تورونتو أو تنزل عند حد من قرايبك أو واحد صاحبك كفسحة وتخلي الطيارة اللي بعدها اللي رايحة Alberta بعدها بأسبوع.

** طب أحاول أهاجر الأول ولا أروح أدرس وبعدين أقدم على الهجرة من كندا؟
مفيش أي حاجة تخليك تيجي على دراسة الأول إلا لو جربت كل حاجة ومش عارف تهاجر. بمعنى, الدراسة دائما هي plan B. لأنك هتدفع فلوس كثير مصاريف دراسة وإقامة ومعيشة لمدة سنة أو سنتين, وبرضو مش ضامن انك تتقبل ك permanent resident.

** أنا متخرج من كلية لكن مجال عملي وخبرتي ملهمش علاقة بتخصصي الدراسي. أعمل ايه؟
ولا حاجة. انت بتاخد نقط على الدراسة لوحدها وعلى عدد سنين الخبرة لوحدها. مش مربوطين ببعض. قدم عادي جدا. وهتختار ال NOC Code بتاع المهنة اللي عندك فيها خبرة عملية. طبعا ده على مستوى الحكومة الفدرالية – حكومة كندا – لكن ممكن كل محافظة ساعة أما تدور على nomination يبقى ليها شروط مختلفة. اتأكد من ويبسايت المحافظة اللي عايزاك.
ملحوظة خارج السياق: أستراليا بتربط الإثنين ببعض.

** الفرق بين ال nomination وال job offer.
ال nominationn هو ان محافظة في كندا عندها نقص في المهنة بتاعتك فبتساعدك انك تيجي كندا عشان تقيم فيها وبكدة ال نقص اللي عندها يقل. هما عندهم نقص لكن هو ملوش دعوة بيك لما بتيجي. انت اللي بتدور على شغل وسكن. ده اللي حصل معايا. مع العلم انه فيه immigrant serving organizations في كل محافظة ممكن تساعدك في كل حاجة انت محتاجها. عشان تعرفهم, ممكن تبص على ال لينك ده:
http://www.cic.gc.ca/english/newcomers/map/services.asp

ال job offer يعني بغض النظر عن المكان اللي انت رايحه عنده نقص في مهنتك ولا لأ, في employer نجح يقنع الحكومة الكندية انه محتاجك, وكدة انت رايح على شغل معين.

في محافظات معينة بتقولك أنا مش هعملك nomination إلا لو جبت عندي – في نفس المحافظة – job offer. دول تحلقلهم. لأن مفيش منطق من الطلب ده. لو أنا عرفت أجيب job offer في أي حتة في كندا يبقى ال points بتاعتي هتزيد 600 نقطة ومش محتاج المحافظة في حاجة.

لكن أغلب المحافظات بتعمل nomination عادي من غير متربطها ب job offer.

** ازاي أقدر أحول درجاتي من ال IELTS أو ال TEF ل CLB؟
http://www.cic.gc.ca/english/resources/…/language/charts.asp

** ازاي تأجر مكان للسكن وانت برة كندا؟
قدامك كذا طريقة:
• لو تعرف حد في المدينة اللي انت نازل فيها وظروفه تسمح انه يستضيفك الفترة الأولى يبقى ممتاز.
• تحجز onlinee في فندق مثلا لمدة أول أسبوعين على ما تيجي وتروح تزور منظمة من اللي قلنا عليهم يساعدوك في الإيجار.
• تحجز شقة بال credit card من على موقع AirBnB.
• لو تعرف حد في المدينة اللي انت نازل فيها, ممكن تخليه يأجرلك شقة باسمه. دور انت من على المواقع دي, وحط عينك على كذا شقة, وخلي صاحبك يبص عليهم ويخلص في واحدة.
http://www.kijiji.ca/
http://www.craigslist.org/about/sites
https://4rent.ca/
http://www.rentseeker.ca/

** ال validity period بتاعت كل حاجة.
• امتحان اللغة: 2 سنة
• ال Express Entry Profile: 1 سنة
• المعادلة من WES: 5 سنين
• ال Permanent Residence: 55 سنين

** ليه ال Job Offer من برة كندا صعب؟
عشان الجهة اللي هتبقى عايزة تديك job offer وحضرتك برة كندا لازم تعمل حجة اسمها Labour Market Impact Assessment (LMIA) وتقدمه للحكومة.
باختصار, ال assessment ده الهدف منه ان ال employerr يثبت للحكومة انه مش لاقي حد بال skills بتاعتك جوة كندا. لازم يثبت ان مفيش Canadian resident أو Canadian citizen يقدر يعمل الشغلانة دي. وده طبعا صعب جدا جدا لأن 99.99% مننا بنشتغل في شغلانات في غيرنا مئات ان مكانش آلاف جوة كندا يعرفوا يعملوها.
فال employerr بياخدها من قصيرها ومبيدخلش نفسه في الحوارات دي. طبعا أنا بتكلم هنا عن واحد برة كندا بيقدم على شغل في كندا. في حالة ثانية ان واحد بيشتغل في شركة برة كندا وليها فرع جوة كندا والشركة قررت تنقله لفرعها في كندا. دي حالة ثانية معنديش تفاصيلها.
واللي عايز يجرب يقدم على شغل في كندا, كثير جدا هيلاقي سؤال بيقول “هل انت عندك وضع قانوني يخليك تشتغل في كندا ؟” أول مل هتجاوب ب “لأ” هيعتذرلك انك مش eligible تقدم.

** لو ليا قريب في كندا, ده يساعدني أو يديني نقط أو أولوية؟
يديك نقط في الجزئية بتاعت ال eligibility بس اللي هي من 1000 نقطة وحضرتك لازم تجيب على الأقل 67 عشان تبقى eligible. تديك هنا 5 نقط. وكمان في ال nomination فيه بعض المحافظات بتديك points أكثر لو ليك قريب عندهم. طبعا لما بنقول “قريب” فده مش معناه أي قريب. درجة القرابة بتلاقيها دايما متحددة حسب المحافظة. جوز بنت عم أبويا ده مش قريب.
أما بالنسبة للأولوية, فلأ. الأولوية في نظام الهجرة للي يقدر يجيب scoree أعلى.

** هوة لازم انجليزي أو لازم أكون بعرف أتعامل على الانترنت عشان أهاجر؟
عشان تهاجر عموما, أو تيجي دراسة طبعا لازم حد أدنى من اللغة. موضوع الانترنت ده لو انت هتشتغل على حاجتك لوحدك من غير محامي, فأكيد لازم تكون قوي في الانترنت. انت أصلا مش هتقابل ولا هتكلم بني آدم في الموضوع كله ولا هتروح سفارة. كل حاجة من على الانترنت.
لو هتمشي مع محامي, المفروض هوة اللي يعمل كل حاجة بالفلوس الكثير قوي اللي هيضربها منك.

** اللجوء في كندا.
http://www.cic.gc.ca/english/refugees/index.asp

** حضرتك جبت كام في ال IELTS وازاي بقيت قوي في الإنجليزي؟
امتحان ال IELTS بيتكون من 4 أجزاء:
Listening – Reading – Writing – Speaking
كل جزء من دول ال score بتاعه من 9
حضرتك عشان تبقى eligible تيجي ك Federal Skilled Workerr لازم تكون جايب على الأقل 6 في كل جزء. أنا جبت 7, 7.5, 8, 8.5.
وموضوع ازاي بقيت قوي في الانجليزي ده مكانش شطارة مني, لأ ده أنا حظي حلو ان أبويا الله يرحمه دخلني مدرسة كويسة. غير اني كنت بشتغل في شركة كبيرة لمدة 10 سنين تقريبا ف التعامل في mails بالانجليزي طبعا. وأنا بحب القراءة جدا من صغري وبقرأ بالانجليزي كثير. مش لازم روايات. لأ مقالات من الصحف الأمريكية والبريطانية الكبرى, مقالات على LinkedIn بتتكلم عن البيزنس وحاجات كدة. وبحب السينما جدا وخصوصا انتاجات هوليوود طبعا. وبنزل الترجمة مع الأفلام بالانجليزي. ده بيعلمني كلمات جديدة غير ان كثر الفرجة على حاجات بلغة معينة بيخلي ودنك تتعود على ال accent وتبقى فاهم كل حاجة في الأغنية أو الفيلم.
دي نصيحتي لأي حد عايز يقوي اللغة: اتفرج واقرأ واسمع باللغة دي ولو لقيت مجال لممارسة اللغة وانك تتكلم يبقى ممتاز.

** هل فيه توثيق لأي ورق من الخارجية أومن أي جهة أخرى في مصر؟
الحمد لله, لأ. الوثائق الأصلية وترجماتها فقط.

** هل ينفع ال TOEFL بدل ال IELTS؟
لأ. كندا عايزين IELTSS.

** ال list of occupations المطلوبة من كل ولاية ألاقيها فين؟
أنا نشرت مواقع الولايات كلها في البوست الأول, لكن واضح ان فيه ناس معرفتش توصل للمفيد. عموما, المفيد أهو:

Alberta
http://www.albertacanada.com/…/progra…/live-permanently.aspx

British Columbia
https://www.welcomebc.ca/Immigrate-to-B-C

Manitoba
http://www.immigratemanitoba.com/immigrate/

New Brunswick
http://www.welcomenb.ca/content/wel-bien/en/immigrating.html

Newfoundland & Labrador
http://www.nlpnp.ca/

Nova Scotia
http://novascotiaimmigration.com/move-here/

Ontario
http://www.ontarioimmigration.ca/en/pnp/index.htm

Prince Edward Island
http://www.opportunitiespei.ca/immigrating

Saskatchewan
http://www.saskatchewan.ca/…/saskatchewan…/apply-to-the-sinp

** اللي لسة متخرج يفكر في الهجرة ولا يستنى أما يجمع عدد سنين خبرة الأول؟
أنا رأيي يستنى شوية عشان يبقى ال score بتاعه أحسن, وعشان يقدر يجيب nominationn. بس اللي لازم يعمله انه يستغل الوقت اللي عنده في انه يقوي نفسه في اللغة, ومن دلوقتي يحاول يشتغل ويبني خبرة عملية في مجال مطلوب في كندا أو في البلد اللي عايز يروحها.
الشباب الصغير في أوائل العشرينات اللي بيعرف المعلومات دي من دلوقتي عنده ميزة مش عند أغلبنا. الوقت … وانه لقى المعلومات اللي تفيده من بدري. يبقى عليه التخطيط السليم.

** لو عرفت أجيب عقد عمل – برة موضوع ال الهجرة خالص – ورحت كندا بفيزا عمل. ينفع بعد كدة أقدم على الهجرة من جوة كندا؟
أكيد طبعا ينفع. هتاخد شوية points حلوة على خبرتك جوة كندا لما تيجي تقدم على الهجرة. كل حاجة عن إذن العمل من هنا: http://www.cic.gc.ca/english/work/index.asp

** أنا عايش في بلد (X). أقدم ازاي وايه الخطوات؟
طريقة التقديم واحدة من أي بلد عربي. كلنا لازم نمتحن لغة ونعمل credentials assessment وبعد كدة نقدم عادي زي ما وضحت الخطوات في البوست الأول.

** لينكات تساعد الناس اللي خلصت كل حاجة بس لسة مجتش كندا وعايزين يعرفوا عما بعد ال landing

Start your life in Canada: http://www.cic.gc.ca/english/newcomers/live/index.asp

Living in Canada: http://www.cic.gc.ca/lctvac/english/index

Welcome to Canada: http://www.cic.gc.ca/…/resou…/publications/welcome/index.asp

Express Entry questions and answers
http://www.cic.gc.ca/…/departm…/media/notices/2014-12-01.asp

IELTS Resources
فيه المواقع اللي تحت دي, وممكن تزور ال British Council تشترك معاهم في كورس IELTSS أو لو انت مستواك كويس اشتري منهم Exam Preparation.
http://www.ielts.org/
http://www.ieltsessentials.com/home.aspx
http://takeielts.britishcouncil.org/
http://www.ielts-blog.com/
http://www.ielts-exam.net/
http://www.ieltspractice.com/
http://www.cambridgeenglish.org/exams/ielts/

أنا كدة خلصت الجزء الثاني. معرفش هيبقى فيه تالت ولا لأ. لكن أنا لاحظت كام حاجة من ال feedback والأسئلة اللي جاتلي بعد أول بوست:

1- جالي أسئلة كثير من ناس واضح انها مقرتش البوست الأول لأن إجابات الأسئلة موجودة في البوست مباشرة. أنا ماجاوبتش على الأسئلة دي تاني هنا.

2- فيه ناس كثير عايزة تهاجر, بس مش عايزين يقروا “كل ده”. مش عارف أقول ايه. “كل ده” هو 1% من اللي ممكن تقراه لو انت واخد الموضوع جد.

3- جالي استشارات كثيرة عن حالات معينة وعايزين رأيي. أنا يا جماعة مش محامي هجرة. فعلا معنديش وقت أرد على حالة حالة. أنا رحلتي لسة مخلصتش وأغلب وقتي بدور فيه على شغل, لأن الاستقرار الحقيقي مش هييجي إلا بعد الشغل. أنا بديك المعلومات والمواقع اللي ممكن تجيب منها أي حاجة انت عايز تعرفها – ده لو مكنتش أنا جاوبتها في البوست مباشرة – وانت عليك الباقي. أنا بحاول أساعد الكل, فبقول كلام يفيد الكل, لكن مش هقدر أتكلم مع كل واحد. عذرا.

4- فيه أسئلة جاتلي عما بعد ال landing في كندا والمعيشة والشغل. الحقيقة أنا رأيي هنا هيكون قاصر ومبني على انطباعات أولية لأني مكملتش شهر ونص في البلد فمقدرش أحكم بثقة وعن معرفة. أنا لسة تايه في حاجات كثير هنا لكن الحلو ان كل يوم بتعلم حاجة جديدة.
لكن هقول رأيي في الهجرة بصفة عامة, هي أصعب خطوة أخدتها في حياتي. انت بتكسر ال comfort zone بتاعتك لأنك بتغير كل حاجة تعرفها في وقت واحد. بتقرر بمحض إرادتك انك تبتدي من الصفر في بلد جديدة مع ناس متعرفش عنهم حاجة وبيتكلموا لغة غير لغتك وثقافة غير ثقافتك. وبتسيب بيتك وأهلك وصحابك وقرايبك والأماكن اللي بتحب تخرج فيها والأكل اللي بتحبه وقنوات التليفزيزن اللي متعود عليها ودوريات كرة القدم والبطولات العربية والأوروبية اللي بحكم فرق التوقيت بتبقى انت غالبا في الشغل. تجربة محتاجة emotional وmental strength غير عاديين, لكن للأسف احنا كعرب مجبرين على الخطوة دي. لأن البديل انك تعيش عيشة غير آدمية في وطن لا يحترمك.

5- ناس كثير من جوة كندا بعتتلي بتعرض خدماتها وإنها تساعدني في الشغل, وده بيأكد ان العرب برة مش أغلبهم وحشين ولا حاجة زي الاعتقاد السائد. فيه شباب زي الورد وجدعان, وأنا هكلمهم واحد واحد 🙂

أخيرا, تمنياتي بالتوفيق للجميع, وأتمنى أشوف ناس منكم في كندا قريبا

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *